Psa 84 | KYG | STEP | Ala kava nene, hu'na, muki vaya'aite'mo yagaika ne'apatana vekae. Nagaemo mai'nanatega mono nokae'mo lusi kava huno ne'nahaiye.

Psalms 84

Goti'a laha maegaiye, hu'a nehaya vaya'mogige'mo alagepa hu'a maisaya kavafe'mo ava gemae

1 Ala kava nene, hu'na, muki vaya'aite'mo yagaika ne'apatana vekae. Nagaemo mai'nanatega mono nokae'mo lusi kava huno ne'nahaiye. 2 Nokafi'mo maisuva yafe'mo lusi kava huno naipamo'mo nehaiye. Muki nagufamo'e naipa nagesafati'e'mo afa'a ne'maiya Gotifeke'mo nehaiye. 3 Aise nama anaga'mogi apano'mo kite'a mai'nage'apae'mo kisave'yavemogi apano'mo hane'nige'a apamu'mo malete'a ai'a apalo atite'a ne'yagaiye. Nokafi'mo ne'maiya'monanafa muki vaya'aite'mo yagaika ne'apatana vekae, hu'na, kini veka'nimo Goti'nimogae, hu'na, nokafi'mo o'mai'ne'na ofalinimo kamisuva hi'yalamukale'mo ofalinimo nehaya hi'yalamukale'e hi'yalamukale'efe'mo nagesamo ne'afuve. 4 Nokafi'mo mai'ne'a yokemo hu'a kagikale'mo ali'a asaga nehaya vaya'mogi kaulagale'mo alagepa hu'a mai'nayanage'a afa'a apamogaga aigae.

5 Lokiya'apimo kagaetegati'mo ali'nisaya vaya'mogimo kaulagale'mo alagepa hu'a mai'nayanage'a apamogaga aigae. Kagaetegamo visaya apaipamo nekaliye. 6 Ka'mo umenitata nehu'apae'mo ani'mo leno lane'niya kalokalopafi'mo apaunumo uno nelamige'a umenitata nehu'apae'mo kelimo kafi male'nageno ko'mo aiteno ani'mo maleno havai te'nige'a ne'nae. 7 Lokiya vaime vaime u'a mago'e hu'a lokiya vai'a u'a aigofe goti'apimogimo aeno apakase'niya Gotitegamo Saiyoni kotegamo agegae.

8 Muki vaya'aite'mo yagaika ne'apatana vekae, hu'na, nunumu nehuvanagi ge'nimo afiyo. Yekopu Goti'amogae, hu'na, afiyo. 9 O Gotiyo, halegutimogae, hu'na, ago. Lekana paika ate'nana vekamo augosafi'mo ago. 10 Mago alagepa haopalegamo u'na yatala afina'mo maisuvana namogaga aiguva'monanafa nokafi'mo aise afina'mo maisuvana mago'e hu'na namogaga aiguve. Nagaemo Goti'nimo no'afi'mo afa ina agufa vekamo kipate'mo ne'yagauva vekamo maisuvafe'mo nahau'niya'monanafa hosu vaya'ai no'apifi'mo hai'na maisuvafe'mo o'nahau'niye. 11 Ala kava netimo'a yegeti'e haleguti'e'mo mai'niye. Agaemo ala apaki'apimo apamiteno alagepa ya'mo fiku hapa maeno apamigiye. Agaemo api kava'mo nehaya vaya'aife'mo magoke alagepa ya'mo magoke'age'mo ali'na lapamiguve huno osugifa muki alagepa ya'amo afa'a alino apamigiye. 12 Muki vaya'aite'mo yagaika ne'apatana vekae, hu'na, Kagaefeke'mo, laha maegaiye, hu'a apakesamo ne'afiya vaya'mogi kaulagale'mo alagepa hu'a mai'nayanage'a afa'a apamogagamo aigae.